: "��� ��� �� �������� ����"

سيدى وستى

سيدى وستى
لما كانوا يفضفضوا
ويلملموا فيض الكلام
كان سيدى يغريه الكلام
يخدوا الخيال يرجع
يجى ميت سنة
الكحة كانت تكشفوه
ستى كانت باختصار
تفرش عليه لحظة حنان
من غير ما حتى تجرحه
او تكسفوه .فتقوله نام
ولانه داء العند فيه
فيقولها من هم يومى تعرفى
فمتضربيش تحت الحزام
فتقوله لسه العقل فيك
لكن كتافك شايلة كام
الشعر شاب
لو بالكلام
ترجع شباب
فيقولها فايح شياط ريحة
الكلام .......
هو انا مش كنت زماااان
فارس وحارس فارش
الستر وامان
فتقوله كان وكان
وحاجات كتير بس الزمان
خدنا وجرى من غير كلام
ونسيب حاجات كانت وكان
مش بالكلام
قعدت تقوله كلام كتير
كان سيدى نام

يا سلام لو كان بايدى

يا سلام لو كان بايدى
كنت اضرب الحرمان
رصاصة
لاجل مالفقير يعيش
واملى وش الناس
بشاشة
وضحكة صافية ما تنتهيش
لو بايدى
اعمل الكفين سفينة
واعبر اللحظة الحزينة
واوصل النقطة الحصينة
واقتل الداء اللى فينا
يعنى تانى منططيش
لو بايدى
احضن البحر اللى حاضن
قلبه الف وميت غريق
وارسم الاحلام لبكرة
يركب الحلم الطريق
وابقى قد القول واقولك
مين عدوك مين صديقك
لو بايدى
كنت اخلى الناس حبايب
اللى جنبك واللى غايب
لو بايدى
كنت هاضرب كل فاسد
كنت اموت كل حاسد
كنت هارمى الشوف وراصد
كل خطوة ف الطريق
كنت اقول وبجد قاصد
لو بايدى
مش هاغنى نشيد بلادى
قبل ما اطيب قلبهم
امهات بتقول ولادى
خدهم البحر المعادى
مين يحاكم مين يقاضى
واللى ساكت يبقى راضى
يبلع البحر الفقير
لو بايدى
بس ايدى قد ايدك
من زمان بنقول ونسمع
ياسلام لو كان يفيدك
ازرع القمح اللى يستر
يومها بس تفك قيدك
مين يكون فى الخلق سيدك
يا سلام لو كان بايدى
كنت مش هاحلم لوحدى
كنت اقولك ع كانت
واللى كان السر فيه
انت مش مخلوق مطاطى
انت مش مولود سفيه
حتى لو مقتول بتنزف
قوم وقاوم
يعنى مش ينفع تساوم
اصل روحك تسوى ايه
وانت لو منتاش معانا
تبقى ناوىتركب البحر
اللى غاوى يبلع
الناس اللى فيه
****************

زيك عواجيز

5
*********
انسان والعود مقطوف
من يوم بذره
وحرص يا حريص
شبابيك العمر اللى فاتحها
والضحكة الخايفة
تلقحها على شارع
كله بيسند زيك عواجيز
والمشهد كله بيتشكل
وروحك بس اللى
بترقص خلف الكواليس
طول عمر احلامك
تحفرها بايديك .تنزلها
تطلع كوابيس
دنيا المولى لوحده مسيرها
عدل ونواميس
طول عمرك تحلب فى الذكرى
ودفاتر الماضى ووجعها
وكل الكرريس
بتخاف من مشيك
متسند زى العواجيز
بتخاف م الموت
والموت عارفك لو كنت
حريص
مش قابلك خد كل معارفك
قدامك طفى الفوانيس
مغرور..........
بتخاف لو ميل بيك ضهرك
وتخاف لو غير لون شعرك
وتخاف من سنك
وبظنك تعمل عتريس
مع انى المشهد قدامك
والشارع كله بيسند
زيك عواجيز
وحبايب العمر اللى شايلهم
ذكرى ف براويز
والموت وسطيهم يتمخطر
بيفوت ع اليابس والاخضر
ويلخبط كل التداريس
دنيا وابواب الموت
اللى بتفتح من غير متاريس
افهم على فين بتروح منك
ولكام هاتعيش
وعروسة بتسهر تتحنى
والصبح تودع فى عريس
دى حقيقة .....
ولو عاقل يقدر يفهمها
كان تاب ابليس

***********************

ملعون ابو القصيدة

القصيدة
***********
مسفوح دم الكلام
والشاعر غصب عنه
يزرع بيوت ينام
وتلع ميت حريقة
اهو رغى والسلام
ويخش فى كل ضيقة
ينفع سبع وجبان
والشاعر غصب عنه
بيحس بكل غيمة
ويشوفها قبل منك
وساعات يحكى اللى كان
وساعات يتحدى خوفه
ويقوم يلعن نظام
وساعات يمسح كسوفه
ويقوم يمدح نظام
يسترخص مع انى
حاجات بتغلى
ولا ارخص م الكلام
ملعون ابو القصيدة
مسفوح دم الكلام
والشاعر لما هلاس
قالك بنطين لحام
والشاعر لما فلاس
قام يمدح ف النظام
يمشى جنب حيطة
بدعوا الاحترام
ملعون ابو القصيدة
ملعون بحر القوافى
اذا كان هايجيب كلام
ورجيم الشعر عنده
حفاظا ع القوام
من خوفه م المحاكم
يبجل كل حاكم
يضرب تعظيم سلام
مع انه غصب عنه
فى مدحه او فى زمه
ضارب تحت الحزام

حلمت كتير

حلمت كتير من نفسها
معرفش ليه كان حلم مر
بعيال تجمد قلبها
لو ايدين
وعيال تبوس وش القمر
مجمعين
كانوا عرفوا يومها ينزلوه
وعجين بلدهم يختمر
لو حتى مر
كان سهل طوعا يمضغوه
عند القضى بيعمى البصر
والعقل سهل يتوهوه
يومها خوفهم كان خاطفهم
مرجع الفارس لابوه
ضربة الجبان رهان
تدخل الجناب تتوه
دلوقت بس بيصرخوا
وبيفتحوا صفحة عتاب
امتى نملى الجوف يا امى
وانت قمحك للطيور
وغراب مخبى فى كل باب
ولقمة الاغراب تغور
والامتى ضحكك للغريب
وبترمى حزنك فى المجور
بعتينا وانت بتحلمى
نملى السما ذى النسور
سبتينا نحبى للسراب
شوفتينا واحنا بنوصلوا
وانت الاهات زرعاها ايدك فى الصدور
ووصلتى مفترق الطريق
اخر سفينة خدها نوح
اذى غريقة وتحلمى
بمد ايديك للغريق
معتش بيشدك طريق
فمتشتكيش ان الطوفان لم الزهور
وتندميش وقت الحصاد
انك لا يمكن تحصدى
والارض بور
وكما لا يمكن تتضحكى
واحنا الآهات جوا الصدور
وانت اللى ايديك طبطبت
حنت الضهور
لكن ضرورى تحلمى
والحلم عمره مكان طرف
انى العيال ترجع نطف
يمكن يكون فيهم عمر
يمكن يكون فيهم صلاح
يمكن يكون فيه قطز
واسمحيلى بالعتاب
هما بس كلمتين
مع انى ابدا مش لئيم
دايما معاكى مستقيم
غرشى بس الخوف قديم
تحت المجور ما يكون خبر
وايدين عيالك رحرحت
ولعدش فيهم لحم مر
وهم عندى وخوف قديم
تحت المجور فيه العبر
وانا حته منك مش نبى
ولسانى لا.. مش لولبى
ولا عمرى ابقى فى غبى
وعشان صريح تستغربى
لو قلتلك رغم عندك
ساكنة تحت الجلد عندى
ساكنة تحت الرمش عندى
ساكنة جنب القلب عندى
صدقينى وغصب عنى
ضهر عصر
غصب عنى بقول يا مصر
لسه قادرة تحلمى بعيال تبوس وش القمر
لسه قادرة تنطقى
قد آيه الصمت مر
وانت قمحك للطيور
وغراب مخبى فى كل باب
ولقمة الاغراب تغور
والامتى ضحكك للغريب
وبترمى حزنك فى المجور
غصب عنى هما دول الكلمتين
مع انى ابدا مش لئيم
بس كان خوفى القديم
قال هانرمى الخطوة فين
****************

الى من علمنى حرف

لما قابلتنى فكرتنى
بحاجات لا يمكن تتنسا
ساعتن ما شوفتك شوفتنى
وحاجات كتير بتقرى بينة
فى عنيك
يا اللى الحروف زرعه اديك
والكلام الحلو دايما ًزرعتك
ترعاه عنيك
انا باقر واعترف
وموجه الكلام دا ليك
انا مهما هاعلى وارتفع
الفضل ليك .. انا بعترف
ساعات كتير كنت اختلف
وياك اسوق الشيطنة
ولما العصايا تنسحب
تنزلى لحظه مسكنه
وتخيل عليك
وبعديها تنسى الشيطنه
واقوم احل المسألة
والضحكه بتنط ف عنيك
قال يعنى كبرت زرعتك
أو صنعتك رجعت اليك
الله عليها ضحكتك
فى عيون حكيم طيب جلى
وحروف بشوفها تنقرى
تنسج خيوط مستقبلى
وانا كنت اسوق المعيله
فى الجد واعمل مهزله
كانت ايدك بتشدنى وتمدنى
بعلوم وكيمياء وفلسفه
وانا معترف بالفضل ليك
عمرك ضميرك ما كتفى
وايديك تملى مغرفه
واحنا بحلوق متشحتفة
تسقينا دايماً بالشفا
احياء وفيزياء ومعرفه
تسلم ايديك
هافضل تملى معترف
بالفضل ليك
ولا عمرى هانسى ضحكتك
فرحتك بتبان عليك
ساعتن احل المسأله
وانت عارف انى انا
كان خطى دايمأ ينحرف
والمد عندى مختلف
استاذ تملى بدون الف
وحاجات كتيره بتتحذف
انا باعترف
استاذى كان بحكمته
وصبر وامانه وشرف
كان مستعد يردنى
وفى كل مره بانضرب
كان يجى تانى يودنى
انا بس عاوزك تتعدل
الفضل ليك
الفضل اليك انا بعترف
بحاجات كتير علمتنى ومنها
الشرف
وانا كنت دايما باختلف
وياك واسوق المعيله
وصيف . شتا كانت
دماغى مقيله
والنحو اكبر مشكله
والجمله عندى محشكله
رفش حتى المبتدأ مرفوع
بايه
أو زيد بيضرب ليه عمرو
معرفش ليه والاشارة والبدل
ومفعول ما قلش مين فعل
معرفش حتى اجيب خبر
ولا احط ايدى ع العلل
تلميذ بليد باختصار
فيه العبر
وساعات كتير كنت اتخنق
من فعل امر
وانت بايديك قومتنى
خبير تقلش فى مختبر
وعشان كده انا بعترف
بالفضل ليك
عديت معاك المرحلة
ولاعدش عندى مشكلة
كل الحروف متصورة ومخضرة
زرعة ايديك
كملت وطالعة مشرفة
كان مستحيل .. العود يموت
رغم اعتزازه بالدفا
والسماد كان الوفا
وكتير مشاعر مرهفة
واحياء .. وانشا .. ومعرفة
وعلوم .. وكيمياء .. وفلسفة
ومش ضرورى افكرك
بحاجات كتير علمتنى
والسنين فاتت كتير
وبرغم انى بقيت كبير
من جمعة بس قابلتنى
بعد السلام
وفجأتنى وقلت ( كان )
ردت بسرعة وقلتلك
تلميذ بليد بس اتعدل
ومش كتير انى اعترف
بالفضل ليك
ومش كتير انى انحنى
وابوس ايديك